ಕೊಂಕ್ಣಿ ಅಕಾಡೆಮಿಚೊ ನವ್ವೊ ಅಧ್ಯಕ್ಷ್ ಜಾವ್ನ್ ರೊಯ್ ಕ್ಯಾಸ್ತೆಲಿನೊಕ್ ಅಧಿಕಾರ್ ಹಾತಾಂತರ್
ಕೊಂಕ್ಣಿ ಅಕಾಡೆಮಿಚ್ಯಾ ಸಭಾಸಾಲಾಂತ್ ಮಾರ್ಚ್ 06 ವೆರ್ ಚಲ್‌ಲ್ಲ್ಯಾ ಸಾದ್ಯಾ ಕಾರ್ಯಾಂತ್ ಕರ್ನಾಟಕ ಸರ್ಕಾರಾ ತರ್ಫೆನ್ ಮಂಗ್ಳುರ್ ದಕ್ಷಿಣ್ ಶಾಸಕ್ ಶ್ರೀ ಜೆ. ಆರ್. ಲೋಬೊನ್, ರೊಯ್ ಕ್ಯಾಸ್ತೆಲಿನೊ ಹಾಕಾ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ನವ್ವೊ (9) ಅಧ್ಯಕ್ಷ್ ಜಾವ್ನ್ ಅಧಿಕಾರ್ ಹಾತಾಂತರ್ ಕೆಲೊ. ಉಪ್ರಾಂತ್ ಬರೆಂ ಮಾಗ್‌ಲ್ಲ್ಯಾ ತಾಣೆಂ “ಹೆರ್ ಭಾಷಿಕ್ ಆಪ್ಲಿ ಮಾಂಯ್‌ಭಾಸ್ ಉಲೊಂವ್ಕ್ ಲಜೆನಾಂತ್. ಪೂಣ್ ಆಮಿ ಕೊಂಕ್ಣಿ ಇಂಗ್ಲಿಷಾಂತ್ ಉಲಯ್ತಾಂವ್. ಕೊಂಕ್ಣಿ ಮನ್ಶಾಂನಿ ಮಾಂಯ್‌ಭಾಶೆ ಥಂಯ್ ಅಭಿಮಾನ್ ಪಾವಾಜೆ. ಆಮ್ಚಿ ಭಾಸ್ ಬಳ್ವಂತ್ ಜಾಯ್ಜೆ ತರ್ ಘರಾಂತ್ ತಶೆಂ ಪ್ರತ್ಯೇಕ್ ಜಾವ್ನ್ ಭುರ್ಗ್ಯಾಂನಿ ಕೊಂಕ್ಣಿ ಉಲಯ್ಜೆ. ಅಕಾಡೆಮಿನ್ ಕೊಂಕ್ಣಿ ಲೊಕಾಚ್ಯಾ ಸಮಗ್ರ್ ವಾಡಾವಳಿಕ್ ವಾವ್ರಿಜೆ” ಮ್ಹಣ್ ಉಲೊ ದಿಲೊ.
ಆಪ್ಲಿ ಭೊಗ್ಣಾಂ ಉಚಾರ್‌ಲ್ಲ್ಯಾ ಅಧ್ಯಕ್ಷ್ ರೊಯ್ ಕ್ಯಾಸ್ತಲಿನೊನ್ ಕೊಂಕ್ಣಿ ಶಿಕ್ಪಾ ಥಂಯ್ ಆಪುಣ್ ಚಡ್ ಹುಮೆದ್ ದಿತಲೊಂ. ಭುರ್ಗ್ಯಾಂನಿ, ಶಾಳಾಂನಿ ಕೊಂಕ್ಣಿ ಶಿಕ್ಲ್ಯಾರ್ ಕೊಂಕ್ಣಿಕ್ ಬಾಳ್ವಿ ಮೆಳ್ತಲಿ. ಬರೊವ್ಪ್ಯಾಂನಿ, ಕವಿಂನಿ, ಕಾರ್ಯಕರ್ತಾಂನಿ ಹ್ಯಾ ವಾವ್ರಾಂತ್ ಸಾಂಗಾತ್ ದಿಜೆ. ತಶೆಂಚ್ ಮ್ಹಾಕಾ ಕರ್ನಾಟಕಭರ್ ಥಾವ್ನ್ 10 ಸಾಂದೆ ಮೆಳ್ಳ್ಯಾತ್. ತಾಂಚ್ಯಾ ಸಹಕಾರಾನ್ ಫುಡ್ಲ್ಯಾ ತೀನ್ ವರ್ಸಾಂಚೊ ಫಳಾಭರಿತ್ ವಾವ್ರ್ ಅಕಾಡೆಮಿ ಥಾವ್ನ್ ಕರ್ತಲೊಂ ಮ್ಹಣ್ ಭಾಸ್ ದಿಲಿ.
ನವ್ಯಾ ಸಾಂದ್ಯಾಂಕ್ ರೊಯ್ ಕ್ಯಾಸ್ತೆಲಿನೊನ್ ಫುಲಾಂ ದಿವ್ನ್ ಮಾನ್ ಕೆಲೊ. ನವೆ ಸಾಂದೆ ಹ್ಯೆ ಪರಿಂ ಆಸಾತ್ ಡೊ. ಅರವಿಂದ ಸಿ. ಶ್ಯಾನುಭಾಗ್ ಬಿಜಾಪುರ್, ಅಶೋಕ್ ಕಾಸರಕೋಡು ಹೊನ್ನಾವರ್, ಡೊ. ಚೇತನ್ ಎಸ್. ನಾಯಕ್ ಧಾರವಾಡ, ಕಮಲಾಕ್ಷ ಶೇಟ್ ಉಡುಪಿ-ಪುತ್ತೂರ್, ಶೇಖರ ಗೌಡ ಬಜ್ಪೆ, ಜಯರಾಮ ಸಿದ್ಧಿ ಯಲ್ಲಾಪುರ, ಎಂ. ಎಂ. ಮೀರನ್ ಬೈಂದೂರ್, ಮಮತಾ ಕಾಮತ್ ಮೈಸೂರ್, ಡೊ. ವಾರಿಜಾ ನೀರೆಬೈಲ್ ಬಂಟ್ವಾಳ, ಯಾಕೂಬ್ ಅಹ್ಮದ್‌ಜೀ ಶಿರೂರ್.
ವೆದಿರ್ ಆಸ್‌ಲ್ಲೆ ಆದ್ಲೆ ಅಧ್ಯಕ್ಷ್, ಬಸ್ತಿ ವಾಮನ್ ಶೆಣೈ, ಎರಿಕ್ ಒಝೇರಿಯೊ, ನಾರಾಯಣ್ ಖಾರ್ವಿ ಆನಿ ಕಾಸರ್‌ಗೋಡ್ ಚಿನ್ನಾನ್ ಬರೆಂ ಮಾಗ್ಲೆಂ. ಭಲಾಯ್ಕೆಚ್ಯಾ ಕಾರಣಾನಿಮ್ತಿಂ ಕಾರ್ಯಾಕ್ ಯೇಂವ್ಕ್ ಅಸಾಧ್ಯ್ ಜಾಲ್ಲ್ಯಾ ಆದ್ಲೊ ಅಧ್ಯಕ್ಷ್ ಮೊನ್ಸಿ. ಅಲೆಕ್ಸಾಂಡರ್ ಸೊಜ್ ಹಾಕಾ ಕಾರ್ಯಾಚ್ಯಾ ಪಯ್ಲೆಂ ವಚುನ್ ರೊಯ್ ಕ್ಯಾಸ್ತೆಲಿನೊನ್ ಭೆಟುನ್ ತಾಂಚೆಂ ಬೆಸಾಂವ್ ಘೆತ್ಲೆ.
ರಿಜಿಸ್ಟ್ರಾರ್ ಡೊ. ದೇವ್‌ದಾಸ್ ಪೈ ಹಾಣೆಂ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ವಿತೊರಿ ಕಾರ್ಕಳಾನ್ ಕಾರ್ಯೆಂ ಚಲೊವ್ನ್ ಅಬಾರ್ ಮಾಂದ್ಲೊ. ಉಪ್ರಾಂತ್ ಚಲ್‌ಲ್ಲ್ಯಾ ಪಯ್ಲ್ಯಾ ಮ್ಹಾಸಭೆಂತ್ ಲುಲ್ಲುಸ್ ಕುಟಿನ್ಹಾ ಬೆಂಗ್ಳುರ್, ಕೆ. ದೇವದಾಸ್ ಪೈ ಮಂಗ್ಳುರ್ ಆನಿ ಲೊರೆನ್ಸ್ ಡಿಸೊಜಾ, ನಾರಂಪಾಡಿ ಹಾಂಕಾಂ ಸಹ ಸಾಂದೆ (ಕೋ-ಆಪ್ಟ್) ಜಾವ್ನ್ ನೇಮಕ್ ಕೆಲೆಂ.
Comments powered by CComment