ಗೊಂಯ್ಚ್ಯಾ ಶೈಕ್ಷಣಿಕ್ ಆನಿ ಸರ್ಕಾರಿ ಸಂಸ್ಥ್ಯಾಂಸವೆಂ ಸಹಯೋಜನಾಚೊ ವಾವ್ರ್ ಕರ್ಚೆವಿಶಿಂ ಚಿಂತಪ್ ಆಟಂವ್ಕ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಏಕ್ ಪಂಗಡ್ ಜೂನ್ 17 ಆನಿ 18 ತಾರಿಕೆರ್ ಗೋವಾ ವಿಶ್ವ್‌ವಿದ್ಯಾನಿಲಯ್, ಗೋವಾ ಕೊಂಕ್ಣಿ ಅಕಾಡೆಮಿ, ದಲ್ಗಾದ್ ಕೊಂಕ್ಣಿ ಅಕಾಡೆಮಿ ಆನಿ ತಿಯಾತ್ರ್ ಕೊಂಕ್ಣಿ ಅಕಾಡೆಮಿಚ್ಯಾ ಮುಕೆಲ್ಯಾಂಕ್ ಭೆಟ್ಲೊ. ಅಧ್ಯಕ್ಷ್ ರೊಯ್ ಕ್ಯಾಸ್ತೆಲಿನೊ, ಸಾಂದೊ ಲೊರೆನ್ಸ್ ಡಿಸೊಜಾ, ರಿಜಿಸ್ಟ್ರಾರ್ ಡೊ. ದೇವದಾಸ ಪೈ, ಆನಿ ಪ್ರೊ. ಸ್ಟೀವನ್ ಕ್ವಾಡ್ರಸ್ ಹ್ಯಾ ಪಂಗ್ಡಾಂತ್ ಆಸ್‌ಲ್ಲೆ.

ಗೋವಾ ವಿಶ್ವ್‌ವಿದ್ಯಾನಿಲಯ್: ಕುಲಪತಿ ಡೊ.ನಾಗೇಶ್ ಶೆಟ್ಟಿಯೆ ಹಾಕಾ ಮೆಳೊನ್ ಕರ್ನಾಟಕಾಂತ್ಲ್ಯಾ ಶಾಳಾಂನಿ ಕೊಂಕ್ಣಿ ಶಿಕ್ಪಾವಿಶಿಂ ಮಾಹೆತ್ ದಿಲಿ. ಉಂಚ್ಲ್ಯಾ ಶಿಕ್ಪಾಂತ್ ಕೊಂಕ್ಣಿ ಯೆತಾನಾ ಸಾಂಗಾತಾ ವಾವುರ್ಚೆವಿಶಿಂ ಚಿಂತಪ್ ಆಟಯ್ಲೆಂ. ತಶೆಂಚ್ ಗೊಂಯ್ಚ್ಯಾ ಪಾಠ್‌ಬುಕಾಂನಿ ಕರ್ನಾಟಕಾಚ್ಯಾ ಕೊಂಕ್ಣಿ ಬರವ್ಪ್ಯಾಂಚ್ಯಾ ಸಾಹಿತ್ಯಾಕ್‌ಯಿ ಆವ್ಕಾಸ್ ದಿಂವ್ಚೆವಿಶಿಂ ತಶೆಂಚ್ ವಿವಿ ವಿದ್ಯಾರ್ಥಿಂ-ಕಾನಡಿಕೊಂಕ್ಣಿ ಬರವ್ಪ್ಯಾಂಚೆಂ ಸಾಹಿತಿಕ್ ವಿನಿಮಯ್ ಕರ್ಚೆವಿಶಿಂ ಉಲವ್ಪ್ ಚಲಯ್ಲೆಂ.

ಕೊಂಕ್ಣಿ ವಿಭಾಗಾಚಿ ಮುಕೇಸ್ತ್ ಪ್ರೊ. ಪ್ರಿಯದರ್ಶಿನಿ ತಾಡ್‌ಕೋಡ್ಕರ್ ಹಿಚೆಸವೆಂ ಶಿಕ್ಪಾ ಗಜಾಲಿಂ ಬಾಬ್ತಿನ್ ಸಂವಾದ್ ಚಲಯ್ಲೊ. ಅಕಾಡೆಮಿನ್ ಸುರು ಕರುಂಕ್ ಯೆವ್ಜಿಲ್ಲ್ಯಾ ಪಿ.ಜಿ. ಡಿಪ್ಲೊಮಾ ಆನಿ ಕೊಂಕ್ಣಿ ಸರ್ಟಿಫಿಕೆಟ್ ಕೋರ್ಸಾಂಕ್ ತಿಣೆಂ ಸಹಕಾರ್ ಭಾಸಯ್ಲೊ.

 

 

 

 

ದಾಲ್ಗಾದ್ ಕೊಂಕ್ಣಿ ಅಕಾಡೆಮಿ: ಹಾಚೊ ಅಧ್ಯಕ್ಷ್ ಶ್ರೀ ಪ್ರೇಮಾನಂದ್ ಲೊಟ್ಲಿಕಾರ್ ಆನಿ ಹುದ್ದೆದಾರ್ ವಿನ್ಸಿ ಕ್ವಾದ್ರೊಸ್ ಆನಿ ವಿಲ್ಲಿಯಮ್ ಮಿನೇಜಸ್ ಹಾಂಚೆಸವೆಂ ಮುಲಾಕಾತ್ ಚಲಯ್ಲಿ. ರೋಮಿ-ಕಾನಡಿ ಲಿಪ್ಯಾಂತರ್, ಆನಿ ಗೋವಾ-ಕರ್ನಾಟಕ ಸಾಹಿತಿಕ್ ಸಂವಾದ್ ಕರ್ಚೆವಿಶಿಂ ಸಾಂಗಾತಾ ವಾವ್ರುಂಕ್ ಚಿಂತಪ್ ಆಟಯ್ಲೆಂ.

 

 

ತಿಯಾತ್ರ್ ಅಕಾಡೆಮಿ: ಹಾಚೊ ಉಪಾಧ್ಯಕ್ಷ್ ಶ್ರೀ ಜೆಸ್ ಫೆರ್ನಾಂಡಿಸ್ ಹಾಚೆಸವೆಂ ಸಂವಾದ್ ಚಲಯ್ಲೊ. ರಂಗ್‌ಮಾಂಚಿಯೆ ವಿಶ್ಯಾಂತ್ ಸಾಂಗಾತಾ ವಾವುರ್ಚೆಂ, ಗೊಂಯ್ಚೆ ತಿಯಾತ್ರ್ ಆನಿ ಹೆರ್ ಪ್ರಕಾರ್ ಕರ್ನಾಟಕಾಂತ್ ತಶೆಂ ಕರ್ನಾಟಕಾಚೆ ರಂಗ್‌ಮಾಂಚಿ ಪ್ರಕಾರ್ ಗೊಂಯಾಂತ್ ದಾಕಂವ್ಚೆವಿಶಿಂ ಅಭಿಪ್ರಾಯ್ ವಿನಿಮಯ್ ಕೆಲಿ.

 

 

ಗೋವಾ ಕೊಂಕ್ಣಿ ಅಕಾಡೆಮಿ: ಅಧ್ಯಕ್ಷ್ ಶ್ರೀ ಪುಂಡಲೀಕ ನಾಯಕ್ ಹಾಕಾ ಮೆಳೊನ್ ನಾಗರಿ-ಕಾನಡಿ ಸಾಹಿತ್ಯ್ ಎಕಾಮೆಕಾ ಲಿಪ್ಯಾಂತರ್ ಕರ್ಚೆವಿಶಿಂ ಉಲವ್ಪ್ ಚಲಯ್ಲೆಂ. ಎದೊಳ್ ಗೋವಾ ಕೊಂಕ್ಣಿ ಅಕಾಡೆಮಿ ಕರ್ನಾಟಕಾಂತ್ಲ್ಯಾ ಖಾಸ್ಗಿ ಸಂಸ್ಥ್ಯಾಸವೆಂ ವಾವುರ್‍ತಾಲೆಂ ತರ್ ಆತಾಂ ಅಧಿಕೃತ್ ರಿತಿನ್ ಸರ್ಕಾರಿ ಸಂಸ್ಥ್ಯಾಸವೆಂ ವಾವ್ರುಂಕ್ ವ್ಹಡ್ ಸಂತೊಸ್ ಭೊಗ್ತಾ ಮ್ಹಣ್ ಶ್ರೀ ನಾಯಕಾನ್ ಸಂತೊಸ್ ಉಚಾರ್‍ಲೊ. ಸರ್ಕಾರಿ ಮಟ್ಟಾರ್ ದೋನ್ ರಾಜ್ಯಾಮಧೆಂ ಥೊಡಿಂ ಕಾಮಾಂ ಕರ್‍ಯೆತಾ ಮ್ಹಣ್ ತಾಣೆ ಅಭಿಪ್ರಾಯ್ ಉಚಾರ್‍ಲಿ. ತಶೆಂಚ್ ಅಕಾಡೆಮಿಲಾಗಿಂ ಪಿಜಿ ಡಿಪ್ಲೊಮಾ ಆನಿ ಕೊಂಕ್ಣಿ ಶಿಕ್ಪಾಕ್ ಸಂಬಂಧ್ ಜಾಲ್ಲೆ ಕೋರ್ಸ್ ತಯಾರ್ ಆಸಾತ್. ತಾಂಚೊ ಉಪ್ಯೋಗ್ ಘೆವ್ಯೆತಾ ಮ್ಹಣ್‌ಯಿ ತಾಣೆಂ ಕಳಯ್ಲೆಂ.

 

Comments powered by CComment

Latest News

Home | About | Sitemap | Contact

Copyright ©2014 www.konkaniacademy.org. Powered by eCreators

Contact Us

Karnataka Konkani Sahitya Academy
Department of Kannada and Culture, Govt. of Karnataka
City Corporation Building, Lalbagh
Mangalore - 575003, Karnataka State
Tele/Fax: 0824-2453167
Email: [email protected]
[email protected]