ಬೆಂಗ್ಳುರಾಂತ್ ಗೌರವ್ ಪ್ರಶಸ್ತಿ 2014 ವಿತರಣ್ ಆನಿ ಮುಖೆಲ್ ಮಂತ್ರಿ ಥಾವ್ನ್ ಕೊಂಕ್ಣಿ ಪೀಠಾಚೆಂ ಘೋಷಣ್

2014 ಜನೆರ್ 18 ವೆರ್ ಬೆಂಗ್ಳುರ್ಚ್ಯಾ ಸಂಸ ಉಗ್ತ್ಯಾ ರಂಗ್ ಮಾಂಚಿಯೆರ್ ಚಲುಲ್ಲ್ಯಾ ದಬಾಜಿಕ್ ಕಾರ್ಯಾಂತ್ ರಾಜ್ಯಾಚೊ ಮುಖೆಲ್ ಮಂತ್ರಿ ಶ್ರೀ ಸಿದ್ದರಾಮಯ್ಯ ಹಾಣೆ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೆ 2014 ವ್ಯಾ ವರ್ಸಾಚೆಂ ಪ್ರಶಸ್ತಿ ಪ್ರದಾನ್ ಕಾರ್ಯೆಂ ಚಲೊವ್ನ್ ವೆಲೆಂ. ಪ್ರಶಸ್ತಿ ಹಾತಾಂತರ್ ಕರ್ನ್ ಉಲಯಿಲ್ಲ್ಯಾ ತಾಣೆಂ ಅಕಾಡೆಮಿಚ್ಯಾ ಅಧ್ಯಕ್ಷಾನ್ ದವರುಲ್ಲಿ ಮನವಿ ಮಾನುನ್ ಫುಡ್ಲ್ಯಾ ಆರ್ಥಿಕ್ ವರ್ಸಾಂತ್ ಕೊಂಕ್ಣಿ ಅಧ್ಯಯನ ಪೀಠ ದಿಂವ್ಚೆಂ ಘೋಷಣ್ ಕೆಲೆಂ.

ಶ್ರೀಮತಿ ಪದ್ಮಾ ಶೆಣೈ, ಶ್ರೀ ಗಜಾನನ ಮಹಾಲೆ, ಶ್ರೀ ಕೋಣಿ ಶೇಷಗಿರಿ ನಾಯಕ್, ಹಾಂಕಾಂ ಗೌರವ್ ಪ್ರಶಸ್ತಿ, ದೆವಾಚ್ಯಾ ಭಾಗೆವಂತಾಂನೊ (ಶ್ರೀ ನವೀನ್ ಕುಂರ್ಬಿಲ್, ಕಿನ್ನಿಗೋಳಿ), ಮಾಗಣಿ ಕೃಷ್ಣಾ ತುಕ್ಕಾ (ಡಾ. ನಾಗೇಶ್‌ಕುಮಾರ್ ಜಿ. ರಾವ್, ಮಣಿಪಾಲ್), ಗಾಂಧಿಚೆಂ ಪರ್ಜಳಿಕ್ ಫುಡಾರ್‌ಪಣ್ (ಅನುವಾದ) ಶ್ರೀ ಜೆ.ವಿ. ಕಾರ್ಲೊ, ಹಾಸನ್ ಹಾಂಕಾಂ ಪುಸ್ತಕ್ ಬಹುಮಾನ್ ಆನಿ ಶ್ರೀ ಆಶ್ವಿನ್ ಎಂ. ಪ್ರಭು, ಮೈಸೂರು, ಶ್ರೀ ಪ್ರಜ್ವಲ್ ಎಂ, ನಾಯಕ್, ಬೆಂಗ್ಳುರ್ ಆನಿ ಶ್ರೀ ಅರುಣ ನಾಯಕ್ ಹಾಂಕಾಂ ಯುವ ಪುರಸ್ಕಾರ್ ದಿಲೊ.

ಹ್ಯಾ ವೆದಿ ಥಾವ್ನ್ ಕೊಂಕ್ಣಿ ಲೊಕಾಂ ತರ್ಪೆನ್ ಮುಖೆಲ್ ಮಂತ್ರಿ ತಶೆಂ ಸಂಸ್ಕೃತಿ ಮಂತ್ರಿ ಶ್ರೀ ಮತಿ ಉಮಾಶ್ರಿ ಹಾಂಕಾಂ ಶೊಲ್ ಪಾಂಗ್ರುನ್ ಮಾನ್ ಕೆಲೊ. ಆನಿ ವ್ಹಡ್ ಗುಮಟ್ ಯಾದಿಸ್ತಿಕಾ ಜಾವ್ನ್ ದಿಲೆಂ.

ವೆದಿರ್ ಮಂಗ್ಳುರ್ ದಕ್ಷಿಣ್ ಶಾಸಕ್ ಶ್ರೀ ಜೆ. ಆರ್. ಲೋಬೊ ಆನಿ ಕೊಂಕ್ಣಿ ಮುಖೆಲಿ ತಶೆಂ ಸೆಂಚುರಿ ಬಿಲ್ಡರ್ಸ್ ಹಾಚೊ ಮಾಲಕ್ ಡಾ ಪಿ ದಯಾನಂದ ಪೈ ಹಾಜರ್ ಆಸುಲ್ಲೆ. ಅಕಾಡೆಮಿ ಅಧ್ಯಕ್ಷ್ ರೊಯ್ ಕ್ಯಾಸ್ತೆಲಿನೊನ್ ಪ್ರಸ್ತಾವಿಕ್ ಉಲೊವ್ಪ್ ದೀವ್ನ್ ಸಾಂದೊ ಅಶೊಕ್ ಕಾಸರಕೋಡು ಹಾಣೆ ಯೆವ್ಕಾರ್ ಮಾಗ್ಲೊ.
ಕಮಲಾಕ್ಷ ಶೇಟ್ ಆನಿ ಅರವಿಂದ ಶಾನುಭಾಗಾನ್ ಕಾರ್ಯೆಂ ಚಲಯ್ಲೆಂ ತರ್ ರಿಜಿಸ್ಟ್ರಾರ್ ಡಾ ಬಿ ದೇವದಾಸ್ ಪೈ ಹಾಣೆಂ ವಂದಿಲೆಂ.

ಕಾರ್ಯಾಚ್ಯಾ ಸುರ್ವೆರ್ ಸಾದರ್ ಜಾಲ್ಲೆಂ ಸಿದ್ದಿ, ಕುಡ್ಮಿ, ಖಾರ್ವಿ ಆನಿ ಜಿಎಸ್ ಬಿ ಕಲಾ ಪ್ರದರ್ಶನ್ ಮುಖೆಲ್ ಮಂತ್ರಿನ್ ಪಳೆವ್ನ ಕೊಂಕ್ಣಿ ಕಲೆಚಿ ತೊಕ್ಣಾಯ್ ಕೆಲಿ.